Ang Mga Kyawkyaw sa Mga Bitter sa Valentine's Day

Humana ang Valentine’s Day. Nagsadya ang mga tindera og buwak sa Freedom Park, ang mga namaligya og stuff toys sa Blue Magic, ug mga tag-iya og mga dagkong restaurants ug dagkong malls tungod kay nahalinan gyud sila og dako-dako gyud sila og halin sa mga buwak, chocolates, teddy bears, ug uban pang mga butang nga pwede naman lang gyud ihatag ning “special” nga adlaw. Luoy naman lang intawon si Dodong nga todo kayod ug overtime aron lang mapalipay ang ilang hinigugma nga si jumega, nga dili naman lang gyud makontento sa pizza nga gidala ni Dodong kay ang iyang ganahan kay buffet man sa Vikings didto sa SM. Pastilan naman lang gyud!

***

Kung buot man gani natong huna-hunaon, kining maong adlawa, sayop man nga kita magsadya! Kay kung ang kasaysayan pa ang basehan, namatay man si St. Valentine aning adlawa. Namatay ha. Niya ngano man nga kita maglipay-lipay? Nalipay ta kay si St. Valentine kay namatay? Dili nalang gyud siguro ta matingala nga matunglo ta madugayan tungod aning atong gipangbuhat. Pastilan naman lang gyud!

***

Kinahanglan ba gyu’ng mabuslot ang bulsa kung Valentine’s Day? Kinahanglan ba nga magpakapobre naman lang gyud silang Dodong karong adlawa aron lang naa’y mahatag kang jumega? Kinahanglan bang magpakanaa bisan wala gyud? Kinahanglan ba? KINAHANGLAN BA? Pastilan naman lang gyud!

***

Ning maong adlaw usab, nisamot ang katrapik sa kadalanan! Trapik na gani ang mgfa kadalanan sa Mango Avenue ug Mandaue, mas nigrabe pa gyud kay halos tanang tawo anaa man sa gawas nangita og kan-anan. Ang singko traynta minutos nga biyahe gikan sa Lahug padulong National Bookstore Mango, nahimo mang usa ka oras ug tunga! Huna-hunaon na lamang nato ang pwede natong mabuhat sa mga nasayang natong panahon sa kadalanan. Tungod lang gyud aning wala’y lami nga selebrasyon! Pastilan naman lang gyud!

***

Usa pa, imbes nga dali ra unta ta makakita og sakyanan sa mga ordinaryo nga adlaw, haskang pagkalisud naman lang gyud! Bisan unsaon pa og hangyo si Manong Drayber nga tugutan ta sa pagkapyot, puno sad ang mga jeep sa mga mangapyutay! Ang mga taxi usab, mura man og nangawala naman sa kadalanan. Nangahadlok nga mapiit sa trapik sa Mactan, Escario, Ayala, ug uban pang mga lugar nga daghan kaayong pwedeng, kahibalo nata, date-an. Kung naa naman lang sad gani mga taxi, papun-an sad og 50 pesos ang pliti tungod kay trapik, alkansi sa gasolina. Ang Grab ug Uber sad, mahal sad kaayo tungod kay high demand man. Ang nalipay ra gyud ani kay ang mga habal-habal driver nga wala ta’y choice nga musakay. Late na gani kita sa atong padulngan, makuyapan sad ta tungod sa kabaho sa ilang mga helmet. Pastilan naman lang gyud!

***

Speaking of helmet. Mao sab ni ang panahon nga kinahanglan mag-helmet silang Dodong. Basin niya madisgrasya ug aduna’y mag-unga-unga nga bata siyam ka buwan gikan karon. Mangalipay nasad ang mga barkada kay laing babaye na usab ang mabuakan. Kahibalo namo unsa ang akong pasabot. Naglibog ko. Dili ba ang Pebrero 14 kay adlaw sa paghinigugmaay? Nganong ang uban i-associate man kini nila sa sex? Tungod kay kung nahiugugma ka sa usa ka tawo kinahanglan nimo ihatag ang tanan? Kinsa man intawong karaang tawo ang nagpasiugda anang tuo-tuo uy! Kung nahigugma ang usa ka tawo sa imuha, kinahanglang kahibalo maghulat. Kinahanglang kuyog mo sa pagdiskubre sa mga butang-butang. Kinahanglang dili pugos. Dili ra ba kamo ang mupakaon sa bata puhon. Pastilan naman lang gyud!

***

Nanggawas ug nakabasa nasad ta aning manag-uyab nga todo post naman lang gyud og mga sweet kaayo nga mga messages sa ilang mga social media accounts. Mamatay nalang siguro ka og scrinoll down sa iyang post apan ang kahumanan dili pa nato makit-an. Mapuno naman lang sad gyud ni sila sa mga emoticons ug emojis. Maglisud nalang sad ta og basa kay nagsobra-sobra naman lang gyud ang mga letra ang ilang “act of showing love.” Mga dodong ug jumega, kung ganahan naman lang gyud mo magpakita og effort, pagsulat naman lang mo og handwritten nga love letter. Aron mas char, kinahanglan mag-calligraphy sad mo aron nindot siya basahon. Dili ta magpakauwaw sa mga post sa social networking sites kay kung muabot ang panahon nga kamo magbuwag, well, kahibalo nami unsa ang mahitabo. Mura ni og love letter nga imong gi-post sauna apan wala na’y emoji ug emoticons. Puro nalang sab pamisti ang among mabasahan. Ganahan mo muabot mo anang tungura? Pastilan naman lang gyud!

***

Ngano kung naa’y special occasions ra man magnaning ang mga tawo sa pagpapakita sa ilang gugma? Kung dili diay Pasko, Bag-ong Tuig, birthdays, monthsaries, ug anniversaries, wala nalang gyud diay? Nganga nalang intawon si jumega? Dili ba pwede nga I love you everyday nalang ang peg pirmi? Pastilan naman lang gyud!