Pakighimamat sa Kaugalingon sa Ika-21 Nga Adlaw'ng Natawhan

Kitang tanan nangandoy nga makab-ot nato ang tanan natong mga gusto kung kita “mudako” na. Ako man gani sauna daghan kaayo kong ganahang mahitabo sa akong kaugalingon. Ganahan ko mahimong computer engineer pareho sa akong Papa nga wala intawon nako nakit-an. Tungod sa mga balita nga muhatag og sakyanan ang mga board topnotchers, sige gyud og pahinumdom si Mama nako nga kinahanglan ko nga mag-accountancy sa UC kay lagi buotan kaayo si Atty. Go. Niabot sad ko sa punto nga ganahan ko mag-maestro tungod sa akong Science teacher pag-elementary. Pagkamaayo naman lang gyud niya mutudlo gud! Lingaw sad kaayo kay niabot usab ang panahon nga ganahan ko mag-pari tungod sa mga seminarista nga nibisita sa among eskwelahan sauna. Karon, graduating nako sa kursong Mass Communication sa University of the Philippines Cebu, sa eskwelahan nga wala ko kahibalo nga nag-exist kung wala ko kung wala ko nag-4th year.

Niya karon, debutante na si oks, ug mao na ni ang panahon nga pwerte na gyud nakong libuga kung unsa ang akong buhaton sa akong kinabuhi. Planado na man gud kaayo ang akong kinabuhi sukad pa sauna kay in-ana man ko pagpadako sa akong ginikanan. Kinahanglan kong magtarung og eskwela aron ma-honor student. Tungod kay honor student man, dali kaayo makakita og trabaho. Kung naa na’y trabaho makatabang na dayon sa pamilya? Dayon? Clueless na gyud kaayo ang inyong jumega. Unsa naman ang akong sundo buhaton? Nganga nalang ta ani naghulat sa langit nga muuwan og kalayo tungod sa mga sala nga akong gibuhat?

Mao to nga for the first time in so many years, nangamuyo ko sa mahal sa Birhen sa Simala. Dugay-dugay nasad kong wala kasimba uy. In fact, mao ni ang pinakauna nga higayon nga ako musimba sa akong adlaw nga natawhan sa sulod sa upat ka tuig. Daw nausab naman gud ang akong panan-aw sa mga butang-butang sukad ko nagtunga sa UP. Mura ba og magsugod na ka og pangutana kung sakto ba ang imong mga nahibaw-an. Kon sayop man gani, unsa man gyud ang kamatuoran. Tungod niini, wala na kaayo ko’y simba-simba og nilayo na gyud ko pag-maayo sa Ginoo. Dili gyud kini charot.

Salamat nalang sa akong mga jumega nga namugos gyud nako, napangitaan gyud og paagi ang pag-adto sa Simala. Kung ikaw naa’y upat ka mga relihiyoso nga mga amiga, peer pressure gyud ang sunod nga mahitabo. In this case, positive hinuon nga peer pressure kay usahay ra gud ko musimba, which is a good thing (I guess?).

Nangadto mi sa akong jumega sa Miraculous Mama Mary sa Simala lungsod sa Sibonga. Mga duha sad ka oras ang biyahe gikan sa Dakbayan sa Sugbo, depende sa imong sakyan. Kung manukad ka sa Cebu South Bus Terminal naa nahimutang dapit sa Elizabeth Mall ug Cebu City Medical Center, daghan kaayo kang kapilian nga sakyanan. Pwede kang musakay og dagko nga bus sama sa Ceres bus o mga mini bus. Komportable usab nga magsakay ka og van sa GT Express Terminal. Pagbantay lang gyud sa kawat kay naa ra ba gyud intawon ni sa Junquera nahimutang.

Kung pliti ang hisgutan, isip estudyante, mas nakatipid gyud mi sa akong mga jumega kay bus man ang among gisakyan og naa sad mi student’s discount. Ang among napiliti niadto kay Php 64 lang sa Ceres bus nga aircon. Kung nagsakay pa mi og regular lang nga Ceres, mas barato pa gyud kini. Mas mahal gyud kung mag-van ka padulong sa Simala kay more or less Php 100 ang pamliti. Kung travel time sad ang imong gihuna-huna, mas dali gyud kang maabot kung mag-van ka tungod kay wala naman kaayo’y hapit-hapit. Sa terminal pa lang daan puno naman ang van. Kung sa bus pa na, pangitaan man gyud og paagi sa konduktor nga mapuno ang bus bisan pa mura na og sardinas sa kahuot.

Human sa duha ka oras, naabot na gyud mi sa eskina sa Simala. Kung nag-van pa mi, wala gyud kaayo’y problema ang naog-naog kay ihunong man ka nila sa gate sa miraculous shrine. Dugay kaayo mi naka-realize ana. Huhuhuhubels. Maong misakay nalang dayon mi og tricycle nga tag-Php 20 ang pliti matag usa. Pagmatngon lang gyud sa mga mangingilad kay matod pa nila, sa matag-cathedral nga itukod sa Ginoo, ang mga demonyo magtukod usab og daghang kapilya. In short, pagbantay sa mga mangingilad kay mu-take advantage ra ba na sila sa mga dayo. Be careful, mga jumega!

Mga 15 minutos sad ang biyahe gikan sa eskina padulong sa Simala. Lubak-lubak sad ang kadalanan, apan okay ra gyud kaayo kay makita man nimo nga daghan kaayong padulngan inig human nimo og simba. Naa man gani hotel nga natukod dili layo sa mismong Shrine.

Pag-abot didto, taas-taas sad ang imong kinahanglan nga tangason. At least, naningkamot sila nga barrier-free sila para dili maglisud og lakaw ang atong mga jumega nga Persons with Disabilities.

Lahi ra gyud ang pamati sa akong pag-abot didto. Makahuna-huna gyud ka sa tanan nimong ganahang buhaton. Makabuang! Basin naswertehan lang gyud mi tungod kay wala kaayo’y tawo niadtong adlawa. Kung sa mga adlaw pa gani nga daghan kaayo og tawo, maglisud gyud siguro ko og huna-huna. Para sad nako, mawala ang solemnity sa lugar. Ako ra sad na ha. Daghan man gud kaayong tawo.

Maka-inspire lang sad gyud hinuon siguro ang daghan kaayong mga hulagway sa mga tawo nga nahimong successful pagkahuman nila og adto didto. Naa’y mga naayo sa ilang mga sakit. Daghan sad kaayong mga estudyante nga migradwar ug nakapasar sa mga board exams. Ang naka-inspire lang gyud nako kay katong usa ka nakapasar sa Bar. Wow. Nakahilak gyud ko slight tungod niya.

Lisud lang gyud kaayo ni kuhaan og hulagway kay gibawal man gud sa guard, so sorry kaayo mga jumega. Kinahanglan man sad gud na kay aron maka-focus ang uban sa ilang pagpangadye.

Daghan sad kang mapalit nga mga memorabilia didto.

Dako kaayo akong pasalamat sa akong mga jumega sa pagkuyog nila nako dinhi. Lingaw gyud kaayo ang akong adlaw nga natawhan!

Kung unsa man ang akong na-realize didto, YOLO nalang gyud siguro na may kasamang disiplina. Charot kaayo sa? Bitaw, maayo man nga huna-hunaon nako ang akong kaugalingon usahay, apan dili nako kinahanglang hikalimtan ang mga tawo nga mao'y nakatabang sa akong nahimutangan karon. Daghan-daghan ra ba ni sila. Maayo man sad siguro nga kuyugon nako ni sila sa akong pag-YOLO in life aron char ang kinabuhi.

Kahibalo ko nga dugay-dugay pa ang sunod nakong simba. Wala ko kahibalo ngano apan naka-feel gyud ko nga dugay-dugay pa gyud na. Busy naman gud ko. Matod pa lagi ni Mama, dili gyud na rason nga dili musimba. Bawlang uy. Dili lang ko musaad kay promises are made to be broken ra ba ana sila. Siguro ang akong sunod nga simba mao ang akong next adventure. Ayaw lang sad intawon uy. Dili ko maghulat nga kabliton ko sa Ginoo. Kahadlok naman lang siguro, jumega!

PS: Daghang salamat sa akong jumega nga si Patricia sa pagpahuwam sa iyang mga hulagway! I love you, jumega!