Pasundayag sa Kaugmaon ug sa Kamatuoran

Hulagway gikan sa Sinulog.ph

Bag-o lang natapos ang labing dakong pista dinhi sa nasud, ang Sinulog Festival. Kung nangita naman lagi ta og lingaw, malisang naman lang gyud ta sa kadaghan natong kapilian. Sa wala pa ang Sinulog, daghan na kaayong mga pasundayag nga mamahimo natong mabatyagan. Magsugod na ang mga kalingawan duha ka semana una ang grand parade. Kung mahiligon ta og variety shows, naa'y daghan sa Fuente Osmena. Adto kita sa mga bar kung ganahan kita mag-unwind o dili ba kaha mangita og mga bag-ong kaila. Daghan usab nga mga Sinulog bazaar ang mga nanggawas nga mura ba og mga kabute. Maglibog naman lang gyud ta og asa ta pwedeng mapaingon.

Sa adlaw mismo sa Sinulog, mas manggawas pa gyud ang mas daghan pa nga mga kalingawan. Kung cultural man gyud ang atong tumong ning maong pista, mangadto ta sa Cebu City Sports Center ug saksihan ang mga grand performances sa mga contingents nga naggikan pa sa nagkalain-laing parte sa nasud. Daghan usab kaayong ikadalit ang mga dagkong malls sa Sugbu. Mga libre nga face painting, pagbutang og mga henna tattoo, ug uban pa ang mamahimo natong makuha didto. Ang mga kabatan-unan usab anaa sa Mango Avenue ug sa karaan nga baseline, nagsige naman lang gyud og sayaw-sayaw sa street parties. Dili naman lang gyud ko kaingon nga sayop ang mayor ning atong dakbayan sa pagpahunong ning maong mga street parties kay ang mga tawo lisud naman lang gyud ikontrolar.

Ang pagtuo sa uban mahuman na ang mga kalingawan inig human usab sa Sinulog, o kung mas specific man gani, ang paghubo sa Balaang Bata. Pagtuo ra gyud kana kutob. Matag tuig naman lang gyud ko maghulat sa mga entries sa Sinulog Short Film Festival. Kini tungod kay isip tinun-an sa mass communication ug isip usa ka information officer sa umaabot, kinahanglan ko nga abtik sa mga trends sa video productions. Dili ra ba intawon pwede nga kita magtanga-tanga sa trabaho labi na kung mangayo na ang atong bossing og dili cliché nga tema alang sa bag-ong promotional video sa ahensiya. Napakita naman lang gyud ato nga film festival nga kitang mga Sugbuanon creative ug at par pa man gani sa mga filmmakers sa kauluhan.

Daghan usab ko og nakat-unan sa tulo ka kategorya ning maong film festival. Sa documentary ug short film category, nakapamatikod nako sa tinuoray nga nahitabo sa atong katilingban karon. Wala nagpasabot kay hayahay ta sa pagpuyo, dili na lamang pud kita muhatag og simpatiya sa atong mga igsuon nga naglisud naman gyud intawon sa ilang kinabuhi. Ang mga documentary ug short film nga naapil sa finalists karong tuiga, kung basehan man ang pulong nga gipangyawit sa mga kabataan, duot naman lang gyud sa kasing-kasing. Makaingon naman lang gyud ta og unsa na ang nahitabo ning atong kalibutan. Pagkahuman naman lang gyud sa matag dokumentaryo, makaingon kita nga kuwang pa ang atong mga gipangbuhat ug kinahanglan na kitang mulihok alang nila.

Sa music video category gipakita ang kaanindot naman atong mga lugar dinhi sa Sugbu. Napakita usab dinhi kung unsa kamaayo ang mga kabataan sa pagsulat og musika. Mas makatabang gyud sa paglambo sa turismo ning atong probinsiya.

Usa pa, magmalipayon kaayo ko nga nahitabo kining Sinulog Short Film Festival nahitabo sa buwan sa Pebrero tungod kay mao sab kini ang National Arts Month. Kining maong selebrasyon naghinaut nga mapreserbar pa nato ang pagbuhat sa daghan naman lang kaayo nga art, lakip na ang filmmaking. Sa pagkakaron man gud, kontentto naman lang ta sa mga ipanggawas nga salida sa mga dagko nga produksiyon bisan puol naman lang gyud ang tema ning maong mga salida. Tungod aning Sinulog Short Film Festival, aside sa papaggawas sa dekalidad nga mga salida, matudluan usa ang mga mananan-aw kung unsa naman lang gyud ang nindot nga salida. Nga makahimo man diay ta og dekalidad nga salida bisan pa wala kini naggikan sa mga dagko nga film productions. Labaw sa tanan, napakita sa Sinulog Short Film Festival ang kamaayo sa mga Sugbuanong filmmakers. Panahon na nga tagaan og mas dakong bili ang Cebu film industry!